《思念．周海媚》KathyChau.site

是一個關於鬼的真人真事。
女主角周海媚，在不知情下做了一些懷疑對女鬼不敬的事情，因而被纏擾了好一段日子。
消瘦18磅，手指骨斷了，只要瞌上眼就看見女鬼面目猙獰的模樣，最後還要找法師超道亡魂……
彷如電影中的情節，但對海味來說卻又是最深切的感受，以為事情終告一段落，隨之而來卻是一次又一次恐怖的經歷，海味就如影片「鬼眼」中能夠看見死人的孩子。
正因為這種超常感應，令海味在人生哲學中，更懂得隨緣。

一尿惹鬼 夜夜癡纏

「一直以來我都唔相信有鬼神存在，初初入行有人問我信唔信有鬼，我仲話呢個世界上邊有鬼呀！有一晚拍外景去到荒山野嶺，半夜人有三急，惟有走到遠一遠的地方就地解决，當時我都唔信有咩禁忌，所以冇講唔該借歪，自此之後我夜晚瞓覺，成日好似有嘢壓住自己，我同阿爸講佢仲用好科學嘅方法同我解釋，話個人攰，瞓得唔好壓住啲神經啫！」
後來一連串的遭遇，相信連科學也無法解釋。

瘦18磅 斷手指骨

「我突然間瘦咗18磅，嗰段時間我冇減肥，食量跟平日差不多，工作也不是很辛苦，我開始覺得有點不對勁，後來拍戲無端端整斷手指骨，我直覺一定係有唔乾淨嘢，之後每當我瞌埋眼無論係瞓着抑或未瞓，我都會見到一個女人好惡咁『掘』住我。於是朋友帶我去見法師，法師話我對女鬼做咗啲不敬的事所以佢一直纏住我，而他口中所形容的女鬼，跟我瞌埋眼見到的一樣，做過法事超渡女鬼之後我再沒有見過她了。」
正當海味以為事情告一段落，卻發現自己經常看見靈體的出現。

半夜撞邪 成車是鬼

「你問我見過幾多次，我真係冇辦法答你，因為真係成日都見到，有一次印象都好深刻，因為除了我之外，同一時間還有一位工作人員見到。那次是到龍蝦灣拍夜班外景，當晚半夜收工同行還有一名工作人員，我揸車準備離開時，有一架車迎面而來，當時覺得好奇怪點解想咁夜仲有車入，所以望下車裏面有咩人，雖然車坐滿人但是樣子完全看不清楚，突然間坐在後排的女子伸個頭出車望我們，她梳冬菇頭，成個頭是正方型，個口鮮紅色仲成塊面咁大，試問邊有人係咁嘅樣？我立即狂踩油走人，後來先知，原來工作人員都見到。」

如有鬼助 事業轉捩點

封陰陽眼 求助法師

為了擺脫這種超常感應，海味曾經請法師相助。
「我唔知自己係咪有陰陽眼，但係記得細個嗰陣，阿媽喺鬼節前帶我去燒衣，我見到一班細路喺度玩，我同阿媽講要同佢哋玩，阿媽就急急腳拉我走，我諗其實我細細個已經見到呢啲嘢，我試過去封眼，但係都冇用，一樣係見到，但我同自己講既然我冇害人，唔需要驚，所以惟有隨緣。正如很多很多的事情上，我都不會強求，現在冇拍拖都唔會求其搵一個人做伴。」
正因為海味隨緣，所以得到的比意料中更多，兩年前第一次扮鬼，在「大鬧廣昌隆」中飾演小芙蓉一角，事業被從新定位，原來「鬼」對於海味來說可以好「老嚟」。

小芙蓉後 時運變高

「其實我拍鬼片唔多，『大鬧廣昌隆』之後，到現在才拍了『陰風耳』和『趕屍先生』，當時真的想唔到小芙蓉會這麼受歡迎，的確是事業上一個轉捩點，但對我來說最意想不到的是，從那時開始我再看不見那些東西了，整整兩年都未見過，點解？我時運高囉！」
對了！坊間嗰句︰「我時運高睇你唔到！」絕對係海味今日得意洋洋的寫照。

後記
信不信由你，好邪！

所謂日頭唔好講人，夜晚唔好講鬼，聽海味講鬼古是在晚上的時份，很有氣氛，正因為一個接一個，不能盡錄的經歷也很動聽，訪問結束，夜闌人靜走在街上心情特別覺得沉重。一位同事因為想得太多當晚睡不着，過了幾日，準備播錄音帶重聽訪問內容，卻不知為何講鬼的部分完全消失，錄到的只是跟她談談笑笑訪問完結後的部分，難道是開動錄音機前，筆者忘了說句︰「唔該借歪？」

2000年11月18日 《東方新地》155期 雜誌掃圖

周海媚頸上戴著一條紅繩，繩上繫著一道平安符。
我取笑她，年紀輕輕，也挺迷信。
「幹娛樂圈的都是寧可信其有，而我戴這道符，無非是想出入平安。」
海味早陣子接了電視台一個劇集，時常要出入清水灣電視城。
清水灣道斜路多，加上早些時淫雨霏霏，很容易釀成交通意外。海味說有一次的士司機失控的交通意外，她剛巧也正駕車前往電視城，目睹的士已變成廢鐵。
「看到也不能說不心寒，所以時常警惕自己，要路路小心，而朋友就是知道我愛駕駛，又比較喜歡開快車，所以替我求了道平安符。」

平安符護身

海味許多時深夜才收工，一個女孩子深宵獨自駕車回家，亦曾碰過怪事。
「看到啲唔乾淨嘢。」她說。
「怕不怕？」
「不怕，我又沒做虧心事，況且我只是見到，又沒對我做甚麼。」
不過，有時她亦會想，可能因為頸上戴有護身符，所以鬼怪不敢對她怎麼樣吧，因此，她是平安符不離身，即使有些朋友取笑她老土，她亦不會介意。
現時，劇集剛煞科，她會有好一陣子不用出入電視城，也不用怕交通意外特多的清水灣道了。
雖然暫時未需投入工作，她亦不見得空閒，因為她忙於搬屋。
海味有舖搬屋癮，每年都會搬一次屋。
有些人搬屋視作投資，因為買了這幢樓，待它升值了再賣掉，又買另一幢，一出一入可以賺一筆，但她卻從來不買，只願租，我說她歷年搬屋，單是裝修費，倒花不少，不划算啊。
「捨不得付首期，況且我要求簡單，裝修費是要花一點，但絕不豪華，因此費用不太多。」
海味有個閨房秘密，就是不愛瞓床。
「每次搬屋，我都不用添新床，單是傢俬費，也慳了一些。」
她覺得睡在床上，可能離地太高，缺乏安全感，所以她只會買一張床褥，每晚瞓「榻榻米」。
「又可能以前拍戲受傷，醫生叮囑不適宜瞓彈弓床，所以自此以後，有不愛瞓床的習慣。」
愛搬屋，是希望久不久令自己有新鮮感，讓自己轉一轉新環境，她自言是喜愛接受新事物的人。
「有沒有看風水？」
「沒有請風水先生，但有朋友懂這些的自動請纓，他說新居跟我幾夾，而我揀樓的條件，是一踏入門口感覺舒服就行。」

沒條件性感

剛搬進新居，電視台就邀請她五月到歐洲拍「寰宇風情」，有免費遊埠機會，她也說是好兆頭。
「當然，最大的願望是事業有更理想發展。」
其實，近期也有好多片商爭邀她性感演出，只要她點頭，肯定片約紛至，但她卻不為所動。
「覺得沒有這個必要。」
還有就是她許多時都瘀痕纍纍，作性感演出也不會好看，跟她演過對手戲的任達華，也說她是容易愛傷的女人，因為輕輕一碰都會把她弄瘀，令他不好意思。
她笑說︰「對呀，早些時劇集煞科，去卡拉OK慶功，我只不過給房內的茶几碰幾碰，兩腳已瘀痕纍纍，嚇了其他人一跳。」
因為沒打算作性感演出，所以她身上的瘀痕，觀眾是無緣看到。

1993年4月《東方新地》102期 雜誌掃圖

海味養狗養了好幾個月，已經可以像專家一樣，大談養狗心得……

很多藝員都喜歡養一些寵物來調劑一下繁忙緊張的生活，而在衆多的寵物之中，她們又大多數喜歡養狗，因狗比起其他寵物懂性和善解人意。
鄭裕玲、葉蒨文、林憶蓮便是愛狗之人。
最近，周海媚也學人養狗，但這隻狗不是她自己買的，而是男友阿呂送給她的一份禮物。
「是什麼狗來？」
「松鼠狗。」
「是狗仔還是狗女？」
「狗仔。」
「爲什麼不養狗女？難道是異性相吸？」我笑她。
「當然不是，你有沒有養過狗？通常都是養狗仔比養狗女方便得多，沒有那麼麻煩。」
海味很疼錫她的小狗，很多時開工都帶着牠的。

對小狗千依百順

「拍戲通常都會拍到三更半夜，帶着牠，豈不是要牠陪你一起捱更抵夜！」
「啊！你放心好了，牠很捱得的，陪我拍幾晚通宵戲，牠都沒有瘦呢！」
海味又說她的小狗被她封爲「狗皇帝」，除了她之外，阿呂和她的家人都對牠千依百順。
「不過牠很『寸』的，很多時都不理睬我的家人，只睬我。」
「誰叫你是最疼錫牠的人，狗很懂性的，要奉承自然也要選個正確的對象。」
養狗養了好幾個月，海味就好像養狗專家一樣，竟教筆者如何防止狗虱？如何幫狗仔冲涼？海味似乎對養狗很有心得。
「養狗其實少點精力也不可以，尤其是冲凉，我幾乎每次替牠冲凉都把自己弄得渾身濕透，又或是整個人掉進水裏。」
「有沒有這麼誇張？」
「眞的，牠好頑皮呀，身體不停移動，但我卻想了個好辦法，就是無論牠多頑皮，我濕了身也不怕的。」
「怎樣？」
「我換了泳衣跟牠一起冲凉囉！」
「高招！眞服了你，人家不知道，還以爲你黐綫。」我打趣地說。
「但這是一種樂趣。」

與阿呂感情穩定

「你好像說過五月尾會去旅行，決定了地點沒有？」
「我想去歐洲。」
「很好呀！歐洲多東西買。」
「我也是想去歐洲買衫。」
海味說她以前穿衣服很隨便，但日子久了她便開始講究起來，尤其是被人說過她穿衣有品味之後，她的要求便愈來愈高。
「這是藝人的包裝和本錢之一。」
「以前太年輕沒有想及這方面，也沒有太多錢去扮靚。」
「你和黎明的緋聞，你好像不願多提？」
「說多無謂，時間是最好的証明，若我說得太多，反而會被人亂寫。」
「如果你和黎明眞的拍拖，我想第一個表態會是阿呂。」我說。
「我和阿呂感情穩定就是最好的証明。」她信心十足地說。

1990年5月 《青春》148期 雜誌掃圖

海味︰我享受拍散拖

《影城大亨》擺明係講緊邵逸夫嘅故仔，所以大宇身邊嘅女人，大家都好自然咁幫佢哋代入現實嘅人物度。好似海味飾演五、六十年代嘅大明星，大家都以為佢扮緊林黛，點知海味連聲否認︰「我從來冇話過要扮邊個，只不過我個角色係五、六十年代嘅紅星，喺髮型、化妝同衫方面，梗係要跟番當時啲人，但實際上我唔需要任何人嘅神韻，做自己就得！」

反對「女追男」

所以其他演員所謂嘅壓力，話驚扮唔到真人嘅神韻，完全唔會發生喺海味身上。不過單係要模仿當時啲人嘅外表，已經一啲都唔簡單，每日淨係化妝梳頭都要搞兩粒鐘！
「我一向鍾意自己化妝，但嗰個年代啲人化妝好細緻，我咁熟手都要化成粒鐘，加埋個真假相接嘅髮型，冇兩個鐘頭我真係唔使旨意入到廠！」
今次海味同大宇一樣有感情線，但竟然係女追男，仲係追唔到悲劇收場嗰隻。海味話︰「都唔知邊個話『女追男，隔重紗』，我就追唔到佢，仲自殺死鬼埋添呀！」佢咁憤憤不平，原來因為佢好反對女追男。
一直係單身貴族嘅海味，堅持唔會放低女性嘅矜持主動追男仔︰「有Feel係一回事，放低尊嚴去追佢又係另一回事，我最多係暗示吓，點都要對方行第一步先！而且我份人幾慢熱，我可以接受一見鍾情，但擦出火花之後，我唔可能即刻同人哋行埋，一定要觀察吓先；況且大家啱啱開始，你估吓我，我又估吓你，係最正嘅階段，絕對唔少得！」

拍長拖嫌困身

海味同其他女人一樣，都希望身邊有個男人好疼錫自己，但他堅持寧缺毋濫。「我話唔鍾意有人錫就呃你嘅，不過總唔可以求其搵件就算，遇唔啱都冇計！不過我以前試過拍長拖，原來都幾困身，我好怕俾人管住管住，連著件衫低胸少少都話唔得，好鬼難頂！起碼依家冇人理我，做乜都Free啲啦！」
海味仲話自己愈來愈獨立，加上身邊好多朋友，令佢不愁寂寞，大時大節都唔怕冇人陪喎！「獨身女仔點都着數，我同男仔出街，對方一定會照顧我，冇男友咪一樣掂！」既然身邊追求者眾，海味有冇考慮過拍散拖呢？「同追我嘅人去吓街、食吓飯，又點算係拍拖呢？所以我一向視所謂嘅拍散拖為正常嘅社交活動，唔好再成日傳我同邊個邊個拍拖嘞，嗰啲唔算㗎！」

大宇海味「互冧」實錄

識於未紅時

大家可能會以為大宇同海味喺《縱橫四海》度係初結片緣，但原來早在大宇未紅時，兩人已經合作過無數次。不過據大宇話︰「當時海味已經係大明星，點會識我呢個二打六！哈哈！」

大宇︰話說當年我喺訓練班出身之後，一直做啲行行企企嘅角色，而海味已經係一線花旦，所以就算一齊拍劇，海味都未必知道我係邊個。合作過幾多次？邊度仲記得！
海味︰邊有咁嚴重呀，我記得有同你合作過，不過冇對手戲之嘛，而且你都唔係咖喱啡，已經有角色有對白啦！
大宇︰嗰啲已經係好後期嘅事，不過講到底，我哋都算識咗好耐。
海味︰梗係啦，唔係拍《縱橫四海》時邊得咁合拍！

最佳另一半

兩人合作朝夕共對咗成年，對方有乜優劣自然心知肚明，但佢哋都異口同聲表示，對方係最佳嘅終身伴侶，仲話如果有個咁嘅老公老婆就真係冇得頂！

大宇︰海味份人最唔好嘅地方就係太情緒化，最慘仲係見佢唔開心多過開心，成日開工都見到佢乸埋塊面，可能女仔貪靚啲啦，碰啱嗰日狀態唔好，或者化妝髮型唔啱心水，容易𤷪𤺧咯！
海味︰好多朋友都話我好情緒化，我得個樣㗎咋，咪睇我成日鬼咁Cool，其實係因為我唔多識笑，個樣好似好寸咁，識落個個都知我傻㗎，「鱷魚頭老襯底」係我咯！
大宇︰好彩我最拿手就係氹人講嘢，多啲搞吓氣氛佢就會開心番。而且海味好健談，基本上你問一句佢會答十句，開工對足半年都唔慌冇嘢講。
海味︰大宇份人好穩陣，同佢傾偈我唔使驚佢會周圍講，我信得過佢㗎！呢啲人做老公就最好！因為感覺上佢唔會係一個浪漫嘅男人，但就夠晒細心，又識得照顧人，就算佢唔喺身邊，都唔使擔心佢會去滾，咁嘅男人唔做老公真係嘥咗！
大宇︰我唔敢講自己係好老公，但正如海味所講，我真係幾鬼悶嘅人，如果啲好活躍嘅女仔對住我，真係驚悶親佢。
其實我都覺得海味會係一個唔錯嘅太太，起碼佢個人夠實際，做嘢好有條理，唔會亂晒大籠。姑勿論佢幾咁情緒化，但有心做一件事，就會好認真。所以佢第時個老公仔唔使擔心娶咗個包袱返屋企，因為海味會好識照顧自己。

聽完佢哋咁講，差啲以為佢哋一個唔覺意戲假情真，好彩大宇即時強調自己已經搵啱咗一個，而海味亦都話咁「理想」嘅男人，未必啱佢，佢仲要繼續搵吓先喎！

2000年4月27日 《東周刊》392期 (陶大宇的單獨訪問沒發布) 雜誌掃圖