Interview: 當紅正是推戲時 周海媚疲累二字捨男友

周海媚受病魔煎熬，捱不了無綫的日夜組工作通告，她一口氣推掉兩部新劇集，堅持要休息一下。
「拍緊呢部『回到未嫁時』，直情係攞命之作。冇時停咁嘅，當正我地做藝員嘅唔係人，係一副機器咁駛法，就算真係機器，咁搞法一樣壞。」
「做乜你拍親的劇集，都好似趕住收工咁嘅，監製要放大假咩定係啲導演想休息？」
「我都唔明啲人而家點拍嘢嘅，開始個陣，成日扮藝術，扮認眞，開工之後得個慢字，到收尾公司叫落嚟，指定要响邊一日拍埋尾嘞，一聲令下，就趕到隻狗咁，害到我哋班藝員。」
周海媚試過三日三夜給編導安排日中夜通宵班，趕到她跟人聊天的心情也沒有。
「太疲累，只係想即刻有個地方瞓得就瞓，我已經試過响架小巴裏面住瞓着咗。」
「咁瞓法好易俾人睇到你冇儀態嘅一面喎。」
「仲有得我哋顧儀態咩？咁捱法，鐵打嘅都頂唔順，何況我又唔係鐵打添。最慘係呢部時裝劇，居然都要吊威也，半夜拍呢場戲，吊足我一個通宵，腰骨都斷咁滯。第二朝又要我開工，唉！有乜法子唔當係攞命之作喎！」
「你唔係怕俾無綫做殘你，即刻推戲啩？」
「當然唔怕，我始終係做藝員啊，有戲做好過冇，但我真係捱得好慘，唔休息返吓，透返順條氣，點夠精力再做？我真係唔想捱到黃胆病呀，肝炎呀咁瞓响醫院嘞。冇人可憐啊。」
「有男友可憐咪得囉！」
「阿呂佢自己都要我可憐佢咋；佢咪一樣咁忙住趕戲。我仲話响四月份可以趕起咗部劇集，攞假去外邊玩吓，佢就連行開一陣都唔得。」
「哦，你今次放假，冇佢份一齊出去玩㗎？你哋兩個之間……唔係有唔妥啩？」
「吓，你哋的人的確怪喎，我哋一齊出去玩，又傳我哋預支蜜月，唔一齊去，又當我哋之間有唔妥，佢行唔開自然唔陪我喇，有乜咁唔妥先！」
周海媚給問得又好氣又好笑。
「聽講你响『回到未嫁時』，又要犧牲色相，着住泳衣拍一場選美噃。」
「小兒科啫，又唔係我特登咁着件泳裝亮相俾人睇，係劇情所需啫。不過咁，我都覺得為咗呢部劇，蝕底好多嘞，而家望快啲收工︰俾我早休息就算嘞，其他費事計。」

1990年《金電視》雜誌掃圖