訪問這天發生了小意外，暫且按下慢表。
兩年前，週刊記者偷拍到周海媚上街買書，書名叫《克里希那穆提傳》。
是，買書。沒有街頭激吻，沒有上門過夜，連書名也是一百個人大概無一個識的，都算反高潮。海味，究竟是你知道有人跟蹤特登玩著，還是我們太無聊乜都影一餐？
這天，正當攝影師調校閃光燈預備拍照前，周海媚告訴我：「那是講一個印度哲學家的書，教人怎預備死亡。」
嗯……
她接著說：「死亡有什麼好怕，我就幾乎死過。」
我腦海立時閃過：紅斑狼瘡症——盛傳她患上但她不認，現在，她要自爆嗎？緊張……
爆！是3200W閃光燈爆了，還燒著上面的濾光紙，我第一個發現，馬上叫她快走。
周海媚呆了呆，笑笑口，施施然走開，還小心翼翼不碰到重重包圍著她的燈架和電線。她沒有騙我，至少她表現得比其他人都鎮定，眼神彷彿還在說：不是嗎？死亡隨時可以發生。
我沒有因此領悟到什麼印度哲學，我領悟到的是中國式神秘主義——即是呢，日光日白死死聲，真係好鬼邪。

出竅

小火撲滅後，周海媚說，她本應死了三次。當然不包括這一次，也不包括剛在《影城大亨》扮演（影射林黛）自殺的那一次。
周︰我從小身體就差，血小板低，容易流血不止。小時候有次暈倒，突然覺得整個人空白了，然後像走進一條隧道，兩旁是一格格過去的畫面迅速流過，最後見到自己BB時的樣子——我當然從舊相看過，但不是這樣生動。
回過頭，我見到爸爸正抱著我替我搽藥油，是，我見到自己身體，即是說靈魂已飛走了。突然啪一聲，原來爸爸狠狠打我一巴掌，我就醒過來。
我那時才十歲，未讀過關於死亡的書。後來才知道，很多人死亡邊緣都是這樣，死亡並不痛苦，你不知道，我知道。
壹：對你有什麼啟發？
周︰長大後我看印度哲學的書，知道人如果在死亡的一刻有怨恨，不開心，這種不快會永遠持續下去。於是我的人生目標是儘量令自已平靜，我開始學瑜伽，後來與Deanie姐（葉德嫻）拍《縱橫四海》，知道她也有玩，向她請教，便學得更投入。
壹：第二次死亡經驗呢？
周︰是幾年前撞車，大家都知道，我斷了手骨，傷了氣門，同樣又是見到那些畫面。我休養了年多才完全康復。

失望

《影城大亨》要谷收視，早前播到周海媚自殺的一幕，拉大隊請埋記者到林黛墓前致祭，獨獨周海媚缺席。
周︰睇出心吧，不一定要做給人看，其實我私底下有去獻過花。我也不是扮清高，實在是他們太遲通知我，我當日又實在有事。
壹：收視不好，失望嗎？
周︰失望。那不是我控制到的分內事。我不敢批評什麼，只可以說劇本真的好重要。我好少拍「飛紙仔」（臨場才收到劇本）的戲，現在則是「飛紙仔」，這已經不是秘密。
壹：喜歡做六十年代做明星還是現在？
周︰應該是六十年代好。聽前輩說，那時一樣有很大競爭，一樣有人鬱鬱不得志，一樣有人自殺。但那時比較能演到戲，片酬一部可以買一層樓，影迷又純，鍾意你鍾了一世；現在社會太多吸引，今天支持你，明天已經支持別人。
壹：感覺到？
周︰我感覺不到就會這樣說啦。
拍完《影城大亨》我到日本拍過一套電影，但日本的經理人合約已完了。說我揚威日本是大家俾面，在日本是nosie（回響）好好，實際收益還是台灣好。台灣方面，自從張雨生（唱片監製）車禍過身後，我的唱片一直停了。
香港真的無辦法，只得兩個電視台，一個只會用自己人，另一個又很少拍劇。
壹：有為自己定下長遠計劃嗎？
周︰計劃是不能刻意的，我簽過經理人公司兩年，那兩年反而最缺工作。

底線

外間盛傳她患紅斑狼瘡症，周海媚一提起就很緊張，招牌表情瞪大眼睛問我：「你係唔係想我話俾你聽我有？」她說，那只是皮膚病，而且已經痊癒了。
周︰我真好多謝大家「咁」關心我的健康。皮膚病期間，我整整三個月未試過化妝，我多病，每次養病時都想過不如不做算了。
壹：恨傳媒嗎？
周︰這次又不算。最難受是當年在TVB，有次發高燒入醫院，有個記者來探我，很關心地問候，還說：「我都知不是真的，不過有人話你來墮胎，我會幫你澄清。」結果第二天，那記者的報紙大大隻字寫「周海媚懷疑入院墮胎」。我覺得好可怕，我是個女仔，這是最嚴重毀壞我名譽。比起這件事，其他都不那麼嚴重。講真，自此我怕了記者，死了心。　　
你偷影我就偷影我吧，對我不是壓力，但你不要走到我門口㩒鐘，我會報警，這是我的最後底線。

捨不得

周海媚永遠戀聞不絕，幾年前有週刊揭發，原來八八年周海媚曾與呂良偉在美國登記結婚，而未正式註冊，周海媚笑言那是霎時衝動，現在反正呂良偉已和鄺美雲結婚又離婚；周海媚新近的緋聞是與有婦之夫伍士榮拉上關係，後來又傳伍士榮搭上韓君婷，那是後話了。
周︰感情生活，現在真沒有。我的感情經歷一直不好，我這個人好飄忽，享受談戀愛，但變得好快。好運應該是初戀那個結婚也是他，我沒有這種好運。
但實際上我是不會結婚的，偶然做一兩次煮飯婆好開心，但我坐不定，所以才學瑜伽，可以平靜一點，又可以減肥和保健。為了健康，我連煙也少吸了。
對，我很保護自己，我不保護自己，誰來保護我？
壹：怕老嗎？
周︰怕什麼？人一出世就等死，怕都要死。很多人死時有很多捨不得，我沒有什麼捨不得……除了家人，我一向很堅強，唯有家人可以令我哭。

美好新世界

周海媚家有一姐兩弟，從小就比姐姐高大，姐姐被人欺負，她會哭會拿掃帚代出頭。
以前周海媚很男仔頭，近千度近視，戴厚得像樽底的眼鏡，從不自覺漂亮——或者除下眼鏡會漂亮，但一除下就自己也看不清自己。直到中三轉戴隱形眼鏡，突然看清了自己，突然收到很多男同學的情信和鮮花，然後突然一天爸爸拿著港姐報名表格叫她參加，我們認識周海媚，就是這樣開始。
世上最美好的事物，周海媚說，可能就是隱形眼鏡。

靚爆燈

周海媚到底沒有說出第三次可怕經驗，而且說著說著改口說成兩次。於是我更懷疑，隱沒了的第三次，會不會就是傳聞中的紅斑狼瘡症——至少，是那相當嚴重的皮膚病。
是，我小人之心，小人多疑，疑點如下：
● 相約訪問，她透過助手指定要在影樓拍照，不可以在戶外。
● 髮型請髮型師幫忙，但化妝一定要自己來，講明不假他人之手。
● 服裝自備，我們想找形象指導也免問。
● 坐的士來，指定的士要停到門前，而不是有數十公呎露天腳程的大閘，下車時還戴著一副與荷蘭球星戴維斯同款的超級保護眼鏡。
● 還有，攝影師為她試燈光，給她即影即有照片看時，她不斷要求燈光打得光一些，免致她眼下看來有陰影，於是閃光燈開大再開大，最後爆了。
爆燈經過，其實是這樣。

2000年7月13日-7月19日《壹周刊》540期 雜誌掃圖

是一個關於鬼的真人真事。
女主角周海媚，在不知情下做了一些懷疑對女鬼不敬的事情，因而被纏擾了好一段日子。
消瘦18磅，手指骨斷了，只要瞌上眼就看見女鬼面目猙獰的模樣，最後還要找法師超道亡魂……
彷如電影中的情節，但對海味來說卻又是最深切的感受，以為事情終告一段落，隨之而來卻是一次又一次恐怖的經歷，海味就如影片「鬼眼」中能夠看見死人的孩子。
正因為這種超常感應，令海味在人生哲學中，更懂得隨緣。

一尿惹鬼 夜夜癡纏

「一直以來我都唔相信有鬼神存在，初初入行有人問我信唔信有鬼，我仲話呢個世界上邊有鬼呀！有一晚拍外景去到荒山野嶺，半夜人有三急，惟有走到遠一遠的地方就地解决，當時我都唔信有咩禁忌，所以冇講唔該借歪，自此之後我夜晚瞓覺，成日好似有嘢壓住自己，我同阿爸講佢仲用好科學嘅方法同我解釋，話個人攰，瞓得唔好壓住啲神經啫！」
後來一連串的遭遇，相信連科學也無法解釋。

瘦18磅 斷手指骨

「我突然間瘦咗18磅，嗰段時間我冇減肥，食量跟平日差不多，工作也不是很辛苦，我開始覺得有點不對勁，後來拍戲無端端整斷手指骨，我直覺一定係有唔乾淨嘢，之後每當我瞌埋眼無論係瞓着抑或未瞓，我都會見到一個女人好惡咁『掘』住我。於是朋友帶我去見法師，法師話我對女鬼做咗啲不敬的事所以佢一直纏住我，而他口中所形容的女鬼，跟我瞌埋眼見到的一樣，做過法事超渡女鬼之後我再沒有見過她了。」
正當海味以為事情告一段落，卻發現自己經常看見靈體的出現。

半夜撞邪 成車是鬼

「你問我見過幾多次，我真係冇辦法答你，因為真係成日都見到，有一次印象都好深刻，因為除了我之外，同一時間還有一位工作人員見到。那次是到龍蝦灣拍夜班外景，當晚半夜收工同行還有一名工作人員，我揸車準備離開時，有一架車迎面而來，當時覺得好奇怪點解想咁夜仲有車入，所以望下車裏面有咩人，雖然車坐滿人但是樣子完全看不清楚，突然間坐在後排的女子伸個頭出車望我們，她梳冬菇頭，成個頭是正方型，個口鮮紅色仲成塊面咁大，試問邊有人係咁嘅樣？我立即狂踩油走人，後來先知，原來工作人員都見到。」

如有鬼助 事業轉捩點

封陰陽眼 求助法師

為了擺脫這種超常感應，海味曾經請法師相助。
「我唔知自己係咪有陰陽眼，但係記得細個嗰陣，阿媽喺鬼節前帶我去燒衣，我見到一班細路喺度玩，我同阿媽講要同佢哋玩，阿媽就急急腳拉我走，我諗其實我細細個已經見到呢啲嘢，我試過去封眼，但係都冇用，一樣係見到，但我同自己講既然我冇害人，唔需要驚，所以惟有隨緣。正如很多很多的事情上，我都不會強求，現在冇拍拖都唔會求其搵一個人做伴。」
正因為海味隨緣，所以得到的比意料中更多，兩年前第一次扮鬼，在「大鬧廣昌隆」中飾演小芙蓉一角，事業被從新定位，原來「鬼」對於海味來說可以好「老嚟」。

小芙蓉後 時運變高

「其實我拍鬼片唔多，『大鬧廣昌隆』之後，到現在才拍了『陰風耳』和『趕屍先生』，當時真的想唔到小芙蓉會這麼受歡迎，的確是事業上一個轉捩點，但對我來說最意想不到的是，從那時開始我再看不見那些東西了，整整兩年都未見過，點解？我時運高囉！」
對了！坊間嗰句︰「我時運高睇你唔到！」絕對係海味今日得意洋洋的寫照。

後記
信不信由你，好邪！

所謂日頭唔好講人，夜晚唔好講鬼，聽海味講鬼古是在晚上的時份，很有氣氛，正因為一個接一個，不能盡錄的經歷也很動聽，訪問結束，夜闌人靜走在街上心情特別覺得沉重。一位同事因為想得太多當晚睡不着，過了幾日，準備播錄音帶重聽訪問內容，卻不知為何講鬼的部分完全消失，錄到的只是跟她談談笑笑訪問完結後的部分，難道是開動錄音機前，筆者忘了說句︰「唔該借歪？」

2000年11月18日 《東方新地》155期 雜誌掃圖

海味︰我享受拍散拖

《影城大亨》擺明係講緊邵逸夫嘅故仔，所以大宇身邊嘅女人，大家都好自然咁幫佢哋代入現實嘅人物度。好似海味飾演五、六十年代嘅大明星，大家都以為佢扮緊林黛，點知海味連聲否認︰「我從來冇話過要扮邊個，只不過我個角色係五、六十年代嘅紅星，喺髮型、化妝同衫方面，梗係要跟番當時啲人，但實際上我唔需要任何人嘅神韻，做自己就得！」

反對「女追男」

所以其他演員所謂嘅壓力，話驚扮唔到真人嘅神韻，完全唔會發生喺海味身上。不過單係要模仿當時啲人嘅外表，已經一啲都唔簡單，每日淨係化妝梳頭都要搞兩粒鐘！
「我一向鍾意自己化妝，但嗰個年代啲人化妝好細緻，我咁熟手都要化成粒鐘，加埋個真假相接嘅髮型，冇兩個鐘頭我真係唔使旨意入到廠！」
今次海味同大宇一樣有感情線，但竟然係女追男，仲係追唔到悲劇收場嗰隻。海味話︰「都唔知邊個話『女追男，隔重紗』，我就追唔到佢，仲自殺死鬼埋添呀！」佢咁憤憤不平，原來因為佢好反對女追男。
一直係單身貴族嘅海味，堅持唔會放低女性嘅矜持主動追男仔︰「有Feel係一回事，放低尊嚴去追佢又係另一回事，我最多係暗示吓，點都要對方行第一步先！而且我份人幾慢熱，我可以接受一見鍾情，但擦出火花之後，我唔可能即刻同人哋行埋，一定要觀察吓先；況且大家啱啱開始，你估吓我，我又估吓你，係最正嘅階段，絕對唔少得！」

拍長拖嫌困身

海味同其他女人一樣，都希望身邊有個男人好疼錫自己，但他堅持寧缺毋濫。「我話唔鍾意有人錫就呃你嘅，不過總唔可以求其搵件就算，遇唔啱都冇計！不過我以前試過拍長拖，原來都幾困身，我好怕俾人管住管住，連著件衫低胸少少都話唔得，好鬼難頂！起碼依家冇人理我，做乜都Free啲啦！」
海味仲話自己愈來愈獨立，加上身邊好多朋友，令佢不愁寂寞，大時大節都唔怕冇人陪喎！「獨身女仔點都着數，我同男仔出街，對方一定會照顧我，冇男友咪一樣掂！」既然身邊追求者眾，海味有冇考慮過拍散拖呢？「同追我嘅人去吓街、食吓飯，又點算係拍拖呢？所以我一向視所謂嘅拍散拖為正常嘅社交活動，唔好再成日傳我同邊個邊個拍拖嘞，嗰啲唔算㗎！」

大宇海味「互冧」實錄

識於未紅時

大家可能會以為大宇同海味喺《縱橫四海》度係初結片緣，但原來早在大宇未紅時，兩人已經合作過無數次。不過據大宇話︰「當時海味已經係大明星，點會識我呢個二打六！哈哈！」

大宇︰話說當年我喺訓練班出身之後，一直做啲行行企企嘅角色，而海味已經係一線花旦，所以就算一齊拍劇，海味都未必知道我係邊個。合作過幾多次？邊度仲記得！
海味︰邊有咁嚴重呀，我記得有同你合作過，不過冇對手戲之嘛，而且你都唔係咖喱啡，已經有角色有對白啦！
大宇︰嗰啲已經係好後期嘅事，不過講到底，我哋都算識咗好耐。
海味︰梗係啦，唔係拍《縱橫四海》時邊得咁合拍！

最佳另一半

兩人合作朝夕共對咗成年，對方有乜優劣自然心知肚明，但佢哋都異口同聲表示，對方係最佳嘅終身伴侶，仲話如果有個咁嘅老公老婆就真係冇得頂！

大宇︰海味份人最唔好嘅地方就係太情緒化，最慘仲係見佢唔開心多過開心，成日開工都見到佢乸埋塊面，可能女仔貪靚啲啦，碰啱嗰日狀態唔好，或者化妝髮型唔啱心水，容易𤷪𤺧咯！
海味︰好多朋友都話我好情緒化，我得個樣㗎咋，咪睇我成日鬼咁Cool，其實係因為我唔多識笑，個樣好似好寸咁，識落個個都知我傻㗎，「鱷魚頭老襯底」係我咯！
大宇︰好彩我最拿手就係氹人講嘢，多啲搞吓氣氛佢就會開心番。而且海味好健談，基本上你問一句佢會答十句，開工對足半年都唔慌冇嘢講。
海味︰大宇份人好穩陣，同佢傾偈我唔使驚佢會周圍講，我信得過佢㗎！呢啲人做老公就最好！因為感覺上佢唔會係一個浪漫嘅男人，但就夠晒細心，又識得照顧人，就算佢唔喺身邊，都唔使擔心佢會去滾，咁嘅男人唔做老公真係嘥咗！
大宇︰我唔敢講自己係好老公，但正如海味所講，我真係幾鬼悶嘅人，如果啲好活躍嘅女仔對住我，真係驚悶親佢。
其實我都覺得海味會係一個唔錯嘅太太，起碼佢個人夠實際，做嘢好有條理，唔會亂晒大籠。姑勿論佢幾咁情緒化，但有心做一件事，就會好認真。所以佢第時個老公仔唔使擔心娶咗個包袱返屋企，因為海味會好識照顧自己。

聽完佢哋咁講，差啲以為佢哋一個唔覺意戲假情真，好彩大宇即時強調自己已經搵啱咗一個，而海味亦都話咁「理想」嘅男人，未必啱佢，佢仲要繼續搵吓先喎！

2000年4月27日 《東周刊》392期 (陶大宇的單獨訪問沒發布) 雜誌掃圖