初入行時，周海媚自喻為一嚿飯，就算鄭裕玲當眾叫她一聲也會令她面紅耳赤；初拍食煙戲時，吳孟達順手遞給她一包總x，既要扮得有型格又要講對白，結果搞到亂晒籠暈陀陀……
經過13年的培訓，海味自喻現階段是散發女人味，形象亦跟着變得性感︰只戴胸圍拍自己的國語歌〈迷戀你〉MTV；着吊帶低胸裙與永瀨正敏激情擁吻拍J-Phone廣告；拍攝Wacoal內衣褲寫真集等。但，點解冇香港份嘅？
「我冇偏心㗎，我今日影相都冇戴bra啦！」

成熟誘惑 電影《野獸刑警》

記憶中，海味與任何「最受歡迎女主角」獎無緣，但在各導演心目中，卻是其中一個受歡迎的女藝人。今次的《野獸刑警》，也因為陳嘉上認為海味有味道及可塑造，於是指定要她演繹劇中媽媽生的角色。
「喜劇我做過，傻妹又做過，其實我覺得我而家要搵另一樣嘢突破自己，但有時呢啲嘢真係要睇機緣。譬如我揀呢套劇嘅時候，都會主動同Gordon（陳嘉上）講我同Michael（王敏德）嗰場一夜情嘅床上戲可以去到邊度，咁佢哋敢去到最盡，拍時就唔會有咁多嘢要就住就住。」

日本fans送塊鏡俾我

海味強調，首次到日本發展便以性感形象出現，並非偏心外地傳媒及觀眾，只是「因為呢個係我第一個廣告，以前可能其他人諗唔到我可以咁樣做，咪冇叫我打扮性感嚟配合佢哋囉。不過我喺外地受歡迎，除咗樣之外，譬如我嘅演技我諗佢哋都覺得好先至會揀我嘅。」
雖然海味在日本還未遇過一些瘋狂fans，但所收的禮物中，最難忘的便是一塊鏡。對此，海味只是笑笑口的表示︰「可能呢啲係佢哋嘅傳統啩。」

直擊日本街頭 喜歡海味夠sex

97年憑一個J-Phone廣告登陸日本。接着的寫真集以至參與由當地投資的電影《不夜城》（暫定今年6月於日本上映），一連串的鋪排，究竟日本觀眾對海味認識有幾深呢？不如就等《便利》於日本街頭問吓啦！

高橋章二 22歲 Designer
我覺得佢好sex。
「我知佢叫Kathy，J-Phone啲catalogue同廣告都見過，我覺得佢好sex，香港女明星之中對佢最有印象。我都幾喜歡佢，知道佢有份演《不夜城》，我一定會去睇。如果佢要喺日本發展，我覺得佢係可期待嘅女明星。」

古川裕作 19歲 大學生
身材好似唔錯，但睇得唔清楚。
「我唔知佢叫乜名，亦都唔知佢係香港人。雖然睇CM唔係太清楚，不過身材似乎唔錯，如果佢識日文同演技好嘅話，喺日本發展都會有前途嘅。」

橫山勝德 26歲 營業代表
原來佢係香港人嚟㗎？！
「我都有睇過J-Phone個廣告，覺得佢係個成熟、漂亮嘅女性，但就唔知原來佢係香港人嚟㗎。個人嚟講，佢係我喜歡嘅類型，不過唔知佢真人同CM嘅形象有冇大分別呢？我覺得佢有潛質喺日本發展，希望可以喺其他節目見到佢啦。」

星伸元 20歲 大學生
日本少呢類型嘅女仔。
「無乜大印象，但講起J-Phone就有少少記憶，原來佢叫Kathy呀！我覺得佢都幾靚，而且呢類型嘅女仔喺日本比較少。」

高戶重樹 18歲 專科學生
未睇過佢嘅演出，但CM嘅形象就幾特別。
「有睇過呢個廣告，但印象唔深，因為未睇過佢嘅演技，CM嘅形象就幾特別。不過我諗佢要喺日本發展會難啲，因為太多對手嘞。」

電視效應 慧慧代表唔晒90’s嘅女性！

好多人都覺得，在《天地豪情》內，海味飾演的程家慧，敢愛敢恨及直率性格，與她真人十分相似，但當事人卻絕不認同。
「除咗我自己又係有個家姐同兩個細佬外，基本上我覺得慧慧嘅性格絕對唔似我，佢係嗰啲鍾意就鍾意，會去主動爭取嘅人，例如好似佢主動追黄日華咁。換轉係我絕對唔會咁樣做，人哋已經講明話唔鍾意你咯，你重去煩人。所以我覺得佢唔可以完全代表晒90年代嘅女性，只不過係一部分啫，例如佢嘅任性同執着。
「當初監製同我傾嗰陣，我第一個收到嘅message就係話呢個女仔係好update嘅，但update得佢又好stubborn咁去對待感情。咁所以未拍前我咪聽多啲收音機，尤其係嗰啲講感情嘅節目，盡量去聽多啲、諗多啲、了解多啲點解有啲人會咁樣諗嘢。」

為咗拍劇拍唔成廣告

縱使在劇中，海味並非由頭帶落尾的第一女主角，但為了拍此套長劇，某些手頭上的工作仍要被迫放棄或延遲，其中一個便是某日本即食麵廣告。
「惟有當係好彩啦，唔使食到嘔，以前某次我拍薄餅廣告時，食第一塊重覺得好滋味，但之後不停咁食就好辛苦，重有種飽到嘔嘅感覺添。」

我最唔掂就係唱歌

在演藝生涯中，海味希望有機會演出舞台劇，但卻坦言最唔掂是唱歌，而令她在形象上開竅變得性感啲、女人味啲，便是MTV。
「我記得係拍學友《吻別》MTV，因為要着高踭鞋、吊帶珠片短裙，嗰時我先覺得自己開始有女人味。向來周海媚不嬲都俾人話係牛王妹，但原來我都可以扮到咁女人，於是我自己嘗試衣着上、化妝上朝住呢個方向走囉。」
當海味得悉早前於《翡翠音樂幹線》內，重播她的舊作〈日出愛情〉MTV時，亦忍不住戲謔，「吓？！咁耐以前嘅嘢都播番出嚟，嗰時個打扮好刻意扮玉女喎！」站在觀眾立場，相信支持現時性感形象的fans會以壓倒性姿態勝出啫。」

1998年4月2日《壹本便利》322期 雜誌掃圖

周海媚 冇胸露背一樣索

32″、26″、37″。
對海味（周海媚暱稱）而言，以這副身材行性感，並不算高難度動作，更沒有甚麼抗拒感。只因一來她覺得胸部不一定是性感重點；二來只要盡量不Show出自己一整條玉腿就可以了。「男仔未必個個都睇女仔個胸㗎，有啲可能鍾意睇膊頭，或者對腳！我嘅膊頭都幾好睇，所以咪夠膽著露膊衫囉！」繼上回日本仔面前性感大晒冷，海味這回對住香港攝影師香港記者，真空上陣品帶背心及膝裙，沒有波濤洶湧，只有膊頭同小腿，再加多一大個玉背—嘩！
算係益番香港人啦今次。

寧冇36″唔要腿大碌

面對自己的三圍數字，周海媚好倔咁話︰「係呀！我身材唔好㗎！都唔係國際標準36″、24″、36″，梗唔好啦！」
若硬要跟國際標準比較，海味除了條腰粗咗啲，下圍大咗啲，最明顯有距離的便是上圍。只是樂觀的她卻沒有因此自卑過。「我唔會因為冇36″而去整㗎！個天俾你係點就係點㗎啦！而家好多Model咪一樣冇胸，都可以着到啲衫好睇㗎！」
假如要改善身型的話，海味寧願選擇減大脾。

日本仔拍寫真靠打燈

「我好肥㗎！而家都肥，尤其係大脾。嗰陣由小學跳中國舞跳到中學，跳完就肥咯！（有冇嘗試過減呀？）有！食減肥藥、做運動囉！不過減嗰陣會好瘦，之後仲肥過以前！」
她記憶所及，最肥的時候，是入行前的130幾磅，入行後斷斷續續也有幾次120多，其中一次是幫日本仔拍寫真集時。「所以嗰陣都係靠個攝影師去就位，同埋靠打燈咋！」尚幸現在的海味磅數約為110左右——不過這天拍照時，遮掩大腿部分依然要靠衣服和甫士。

大脾位最敏感

問到她自覺身體那部分最性感︰「性感唔一定係露身材㗎，有時一個笑容都可以好性感㗎！」咁你個嘴算唔算性感呀？「我從來都唔覺得我個嘴靚㗎！兩邊嘴角Dup晒落嚟，俾人感覺好串！」排牙又點呀？「OK啦！有對大板牙咁囉！（幾整齊呀！）唉，唔整齊嗰啲你見唔到啫！」咁究竟邊度最性感啫？「唔知呢，性感嘅嘢，感覺嚟嘅！」說時把頭轉向記者，眨了幾下眼…
退而求其次，惟有問她身體的敏感部位。想不到這次她很爽快地回答︰「大脾！」又係大脾？「我怕『唧』嘛！按摩都唔俾人掂㗎！掂少少都會嘩！（聲調提高2倍）即刻縮！如果按摩嗰個人唔識按，我會踢人㗎！」

XO海味贏香檳嘉欣
海味性感魅力，連台灣網友都電量，在網上票選她做「XO女郎」。而海味更以大比數贏了第2位「香檳美人」的李嘉欣，網友覺得Michelle的醇不及XO般性烈，唔夠激喎！

第一次俾咗吳啟華

關於拍親熱戲，海味輕描淡寫地道︰「最好唔使拍！不過冇得唔鍾意嘅，工作需要咪做囉！」並唔係晦氣話，只因俾著任何人，都會咁樣諗︰「呢啲嘢梗係同自己男友做最舒服㗎啦！拍戲咁多工作人員喺度，呢個嗌Cut，嗰個又嗌Action、Camera，都唔係嗰種氣氛……」
而海味熒幕上的第一次親熱戲，就在《流氓大亨》中，獻了給吳啟華。
「嗰場戲喺沙灘度錫完之後就上床，以嗰陣電視尺度嚟講，都算幾犀利！個意識好勁！」
唔經唔覺，原來已差不多成11~12年前的事。始終當時年紀少，還是海味玉女時期嘛，性感程度當然唔及而家。「我而家拍嘅床上戲，講真，差少少就3級㗎！真係幾激㗎！」
講嘅係新戲《追兇二十年》同謝君豪嘅一場情慾戲，究竟有幾激，請睇隔籬。

海味被撕Bra四部曲

當鍾真、冬怡呢啲脫星全力露3至4點，各位看官都覺得不外如是，好似應分咁。但只要啲上位女星露少少邊皮少少碗，咁就大件事喇！繼《野獸刑警》後，海味同《南海十三郎》謝君豪喺《追兇二十年》有場火辣「情慾戲，兩位初次合作就整場「撕Bra實錄」，齊齊挑戰性感極限，睇到幾多就「豐儉由人」囉。

《追凶二十年》講啲乜？
故事方面走驚嚇追兇路線，有啲似西片《沉默的羔羊》。講20年前女童母親慘被姦殺及肢解。20年後女童長大做咗督察，佢當然叫周海媚啦，劇情係兇手再現，仲向海媚四啲人落手，殺呀姦呀，到底誰是兇手大家買飛就知啦。

1998年4月21日《東TOUCH》151期 雜誌掃圖

周海媚形容自己像一匹馬 （她註︰不是快活谷跑那些，是草原上的野馬），除了因為生肖屬馬兼星座是人馬座外，愛好自由自在的本性係最大因由。
訪問後與等待影相之間，她的腦袋忽然有了奇思妙想︰「若果今晚這裏（studio）發生了一宗命案，我們當中其中一個人死了，你估誰是兇手？動機又是為了什麼？……」
一時不知她忘記了甚麼，一邊翻找東西一邊頻向其助手說︰「死啦！柏金遜添！」這個口頭禪，神經質地出現了好幾次。
還有，談起學東西，她一本正經地說人一定要多學習，就是愛因斯坦也只不過使用了腦袋的1%，想來我們常人也許只用了0.005%云云；攝影擺甫士的時候亦參與表達意見（原來她也曾經修讀攝影課程），好像提議某動作pose揸煙比揸花是否更好呢？我們當然覺得更加妙，難得是當事人爽快表示的不介意。於是，點煙吸煙手提根煙沉思一個個酷樣即時呈現眼前，神情處處，較旁觀者也看得為之投入。
果然是位專業合作的女演員。
「海味」有個奇想，若果一日真有外星人降臨地球，她會不顧一切跟「它」遠走高飛（死又好點都好），既然有機會接觸另一個連今日發達科技也解釋不到的空間，她一定不會放過。
突然間覺得這個眼前人好可愛。

香港「莎朗史東」？

「我覺得係……一個形容詞來的，只不過是形容我的新image吧了。
「對於別人的看法，我唔能夠控制。但我自己就希望在演藝事業上能夠飾演多變化些的角色，不想死板地演同一樣的，被框框限制。
「性感是好抽象㗎，好像『靚』一樣，每個人審美眼光、定義也不同。有人認為要剝衫或少衫，甚至看見接近私處的部位為之性感，我認為沒有需要這樣。性感完全是一種感覺。
「有甚麼吸引人的地方？……（笑）…我真係…實在無諗過，…真係（想了一會）…我想是自己戲內的角色人物性格以外的，我相信得到觀眾認同及支持的是我的態度吧！例如在訪門裏或是在某些場合，我會堅持我的原則吧…我唔知，亦都無問過人，這是我估計的。
「在《愈墮落愈英雄》中予人感覺我好像是首次飾演壞女人這種人物，相信這只是在電視上而已，事實上我在電視台也曾經演過。好像《倚天屠龍記》的周芷若，之前好楚楚可憐的，原來後尾發現她是可以這樣狠心同記仇的一個人，不過由於她的遭遇，大家亦好有理由原諒佢。至於《愈》片中的角色，導演霍耀良亦同我講這個女人其實都好無奈，點解佢要背叛男人呢…最初她也只是一個很無知的女仔，剛由鄉下到來這個花花世界，敵不住世界的引誘及自己的貪念，所以不斷向上爬，後來發現男人的世界裏原來有些情況是不容許女人存在的，佢唔忿氣唔甘心，可以話好任性，因而導致最後落得唔好下場。
「咁女人都會有自己的世界啦，好似我哋女仔傾心事，唔關你哋男人事，係咪？大家要識得去互相尊重同體諒吧！」

天真，一枝花

「我覺得好可愛㗎喎，如果有這種性格的話。天真等於有種好奇心，好似小朋友一樣，保持這個心態，好重要，因為可以發掘更多的知識，這個世界一路進步，有好多事物要去發現，而且是一世也識不盡的，所以有好奇心好重要。有句老話講『活到老學到老』，我自己就覺得好啱。
「寫真集有些人覺得好有些人認為唔好，意見各異。但我自己發現某些拍出來的相，看過以後即時覺得『嘩！好似我喎！』即是把我心裏面的感覺表露出來。譬如有幅黑白照，是full shot的，映我著住拖鞋梳住馬尾係咁走，我看後也認為好似我喎，我就係咁。那次是攝影師突然叫我由這邊跑到那邊，我話（瞪大眼）『吓？走呀？點走呀？』最初我會覺得好奇怪，都在想着點走好呢——我無諗過點解攝影師叫我走，而是點走好呢？用什麼心情走？初初走得很拘束，走走吓開始跳…好開心囉！我嗰時真係搵到自己，真係搵番『天真』這樣東西…攝影師在這方面都好敏銳。
「三十歲？…其實我從來對數字都唔敏感，我係唔上心的…（笑）…我試過呀有一年寫錯了自己年齡…（笑）…仲要係好離譜那種…。但有位前輩曾經告訴我，嘗試去想想這個世界，就是歷史或許也不過是幾千萬年的事，那麼你人生短短幾十年，算得上是甚麼？所以，我覺得自己其實係好渺小。
「我覺得唔可以用年齡來界定要做到甚麼，每個人的情況不同，成熟程度及成長過程不同，遇到的事情也不同，對事物又有不同的理解，我認為唔可以這樣去界定。」
「大個女…大過十年前未入行時（笑）…在某方面我的性格依然好傻更更的。
「不知道甚麼為之是改進，但我覺得自己有改變到囉！事情上的處理改變了、說話方面也改變了。以前不知道怎樣去表達同應對，很容易pass了錯誤的message，令人誤會意思，現在我會儘量想清楚才去講，這樣會好些。但係事實上我的原則就從來無變，包括工作上的態度、自己的生活方式、對朋友的態度啦，包括生活上許多事情。」

依然夠格

「地位穩定？…唔可以咁講，我自己都唔可以咁講，（笑）亦都唔敢講。我覺得是需要不斷改變，如果仍然停留在起步時候，就等於永遠不會進步甚至是退步。我認為自己作為演藝人要去做performance的，需要多些變化，帶來新的意念、俾別人去感受吓，我現在暫時未能做到，我都希望自己能夠做到。
「入行以來受到多少的傷害，其實唔算好多，又唔可以講好少。呢個問題都好敏感。但是既然我從來唔講，所以，這次我也不想講。
「好像我入行第一日不會被外間影我的家，我到今時今日都不會影，就算有雜誌說可以提供家居去影相，我亦說不答應。
「我明白，每個人都會有好奇心，我自己都有，但我覺得尊重都好緊要。其實大家喜歡發掘，亦即表示對你有興趣，喜歡我的，我好多謝你哋支持，但是如果真的對我好，想我好的話，我就更加希望你會尊重我了。
「以前我鍾意給自己一個好長遠的計劃，例如成日坐在屋企諗，到我老那日會點呢？想了很多假設的故事。現在我不會想到咁長遠的了，只不過俾自己一個概括、差不多的念頭，例如以前會諗『幾時死好呢？』而家就不會這樣想，就算死都無計，也許明天就…touch wood講句…唔知的嘛（笑）。但我仍然有一個計劃，有自己的一個格言，好像我在這一刻要離開呢個世界，我會儘量令到自己無憾。
「人生沒有甚麼一定要做到㗎，以前我覺得唔開心，希望一定要做到甚麼，那些都係好理想，好遙遠囉。
「現在想的，會是例如好想飲一杯水，就可以即時拿起個杯喝下去這些吧！
「我撞車後的一段時間，所有工作窒住了、做不了，那時看事物都變得幾灰——因為我本身個人很樂觀的——那個階段在灰暗與迷惘中渡過，唔知自己想做甚麼，可以做甚麼。有這樣的人生經歷係好事來的，好比若果我未試過感情失敗、未試過事業上的低潮、受批評等，我想我不會懂得去反省，而永遠就只是溫室裏的一盆鮮花。
「我唔敢講話十分之了解自己，但是了解自己的程度就比以前多咗，例如知道自己鍾意些什麼、過怎樣的生活…可以說了解自己用點樣的態度去面對人生。」

Love & Hate，幻想新世界

「我的男偶像演員…（笑），總共分三個階段的。好細個，三歲的時候我好鍾意奇連伊士活，他在《獨行俠》裏咬牙簽的樣子好型。第二是保羅紐曼，我覺得他做戲好好，好有味道啦！跟着是飾演007的辛康納利，看過他後期年長的樣子愈來愈有型，還有米路吉遜。
「這幾位男仕都有好man的元素，有自己character，好獨當一面，有獨特的個性，這是他們吸引我的地方。
「最討厭的是………好比我經常遇上某些人，他們為了保護自己而不講出事情的真相但卻傷害到別人，又或者是不想惹有任何的麻煩而做出不顧後果的事，講傷害人的話或做出傷害人的行為，對於這些我亦感到好無奈。
「好多人對我都有很大的影響，比如我外公啦。他工作得很辛苦，做過漁民、耕過田、打過仗、走過難、做過泥工。但是他很樂天知命。在我細時的記憶裏面，他只要有孖蒸、有花生送酒，就已經好開心。做工幾辛苦，他仍然會好享受飲酒的時刻。我在兩三歲的時候看見這個picture，感到好深刻。
「我真係好少恨一個人…我自己會諗，憎佢做咩呢？自己傷腦筋，又死好多細胞，憎人時個樣又難看，又要皺眉頭，皺得多又有皺紋（笑）。其實去恨一個人，那個人好可能不知道，或者仲活得好開心…，所以這是一件幾愚蠢的事。
「我喜歡看克里希那穆提的書，他是一個印度無神論者，亦都係思想家，發表了很多哲理及言論。他又不會框着一個思想，只是提出問題俾你自己自由去諗。我挺喜歡幻想的，幾鍾意四處去看看周遭的事物。最近我正在看一本書，名叫【Sophie’s World】，不是日本人寫那本，是一個挪威作家寫的，在諗嘢方面啟發了我很多，因為我是個幾性急的人，發生甚麼事會抒發出來先，但現在會考慮到環境才會表達出來。
「初入行那時候我讀了三個月的訓練班，有導師講過我對眼識得做戲，當時我諗『咁即係點呀？』有好多question mark（記得那時我是大近視，但啲人就話我放電，我自己都搔頭）。後來有個測驗，叫大家望着錶一分鐘甚麼都不講，我腦海裏面出現了好多片段，都是沒有條理的，後來告訴導演，他說我是個很愛幻想的人，幾適合演戲這行。因為演戲需要代入不同角色，要令到自己好鍾意那個人物性格，所以幻想力就要夠豐富至得。」

後記︰

有次周海媚到某話題，想着想着要舉例子，想說下去時點知已經忘記了起點︰「…例如…講講吓…講到乜呢…我講到邊（忍不住大笑）哈哈哈！……我是否吃了藥呢？又要再諗過…。我可以諗好多東西，但表達方面就唔係太好…」
提到初入行一次尷尬場面，是與數名男女等廠車時齊齊看電視，見一賣米廣告上某壯男托米片段，忍不住同隔籬女仔講︰「乜咁醜樣？我第日男朋友一定唔要咁樣…」於是大家會估到，原來現場同看電視的其中一人就是那個男model。
「海味」說話的瞪眼習慣，以往在銀幕上看到會認為是作狀，這次看到了，感覺卻是情真。

1998年8月20日 《電影雙周刊》505期 雜誌掃圖