《思念．周海媚》KathyChau.site

初入行時，周海媚自喻為一嚿飯，就算鄭裕玲當眾叫她一聲也會令她面紅耳赤；初拍食煙戲時，吳孟達順手遞給她一包總x，既要扮得有型格又要講對白，結果搞到亂晒籠暈陀陀……
經過13年的培訓，海味自喻現階段是散發女人味，形象亦跟着變得性感︰只戴胸圍拍自己的國語歌〈迷戀你〉MTV；着吊帶低胸裙與永瀨正敏激情擁吻拍J-Phone廣告；拍攝Wacoal內衣褲寫真集等。但，點解冇香港份嘅？
「我冇偏心㗎，我今日影相都冇戴bra啦！」

成熟誘惑 電影《野獸刑警》

記憶中，海味與任何「最受歡迎女主角」獎無緣，但在各導演心目中，卻是其中一個受歡迎的女藝人。今次的《野獸刑警》，也因為陳嘉上認為海味有味道及可塑造，於是指定要她演繹劇中媽媽生的角色。
「喜劇我做過，傻妹又做過，其實我覺得我而家要搵另一樣嘢突破自己，但有時呢啲嘢真係要睇機緣。譬如我揀呢套劇嘅時候，都會主動同Gordon（陳嘉上）講我同Michael（王敏德）嗰場一夜情嘅床上戲可以去到邊度，咁佢哋敢去到最盡，拍時就唔會有咁多嘢要就住就住。」

日本fans送塊鏡俾我

海味強調，首次到日本發展便以性感形象出現，並非偏心外地傳媒及觀眾，只是「因為呢個係我第一個廣告，以前可能其他人諗唔到我可以咁樣做，咪冇叫我打扮性感嚟配合佢哋囉。不過我喺外地受歡迎，除咗樣之外，譬如我嘅演技我諗佢哋都覺得好先至會揀我嘅。」
雖然海味在日本還未遇過一些瘋狂fans，但所收的禮物中，最難忘的便是一塊鏡。對此，海味只是笑笑口的表示︰「可能呢啲係佢哋嘅傳統啩。」

直擊日本街頭 喜歡海味夠sex

97年憑一個J-Phone廣告登陸日本。接着的寫真集以至參與由當地投資的電影《不夜城》（暫定今年6月於日本上映），一連串的鋪排，究竟日本觀眾對海味認識有幾深呢？不如就等《便利》於日本街頭問吓啦！

高橋章二 22歲 Designer
我覺得佢好sex。
「我知佢叫Kathy，J-Phone啲catalogue同廣告都見過，我覺得佢好sex，香港女明星之中對佢最有印象。我都幾喜歡佢，知道佢有份演《不夜城》，我一定會去睇。如果佢要喺日本發展，我覺得佢係可期待嘅女明星。」

古川裕作 19歲 大學生
身材好似唔錯，但睇得唔清楚。
「我唔知佢叫乜名，亦都唔知佢係香港人。雖然睇CM唔係太清楚，不過身材似乎唔錯，如果佢識日文同演技好嘅話，喺日本發展都會有前途嘅。」

橫山勝德 26歲 營業代表
原來佢係香港人嚟㗎？！
「我都有睇過J-Phone個廣告，覺得佢係個成熟、漂亮嘅女性，但就唔知原來佢係香港人嚟㗎。個人嚟講，佢係我喜歡嘅類型，不過唔知佢真人同CM嘅形象有冇大分別呢？我覺得佢有潛質喺日本發展，希望可以喺其他節目見到佢啦。」

星伸元 20歲 大學生
日本少呢類型嘅女仔。
「無乜大印象，但講起J-Phone就有少少記憶，原來佢叫Kathy呀！我覺得佢都幾靚，而且呢類型嘅女仔喺日本比較少。」

高戶重樹 18歲 專科學生
未睇過佢嘅演出，但CM嘅形象就幾特別。
「有睇過呢個廣告，但印象唔深，因為未睇過佢嘅演技，CM嘅形象就幾特別。不過我諗佢要喺日本發展會難啲，因為太多對手嘞。」

電視效應 慧慧代表唔晒90’s嘅女性！

好多人都覺得，在《天地豪情》內，海味飾演的程家慧，敢愛敢恨及直率性格，與她真人十分相似，但當事人卻絕不認同。
「除咗我自己又係有個家姐同兩個細佬外，基本上我覺得慧慧嘅性格絕對唔似我，佢係嗰啲鍾意就鍾意，會去主動爭取嘅人，例如好似佢主動追黄日華咁。換轉係我絕對唔會咁樣做，人哋已經講明話唔鍾意你咯，你重去煩人。所以我覺得佢唔可以完全代表晒90年代嘅女性，只不過係一部分啫，例如佢嘅任性同執着。
「當初監製同我傾嗰陣，我第一個收到嘅message就係話呢個女仔係好update嘅，但update得佢又好stubborn咁去對待感情。咁所以未拍前我咪聽多啲收音機，尤其係嗰啲講感情嘅節目，盡量去聽多啲、諗多啲、了解多啲點解有啲人會咁樣諗嘢。」

為咗拍劇拍唔成廣告

縱使在劇中，海味並非由頭帶落尾的第一女主角，但為了拍此套長劇，某些手頭上的工作仍要被迫放棄或延遲，其中一個便是某日本即食麵廣告。
「惟有當係好彩啦，唔使食到嘔，以前某次我拍薄餅廣告時，食第一塊重覺得好滋味，但之後不停咁食就好辛苦，重有種飽到嘔嘅感覺添。」

我最唔掂就係唱歌

在演藝生涯中，海味希望有機會演出舞台劇，但卻坦言最唔掂是唱歌，而令她在形象上開竅變得性感啲、女人味啲，便是MTV。
「我記得係拍學友《吻別》MTV，因為要着高踭鞋、吊帶珠片短裙，嗰時我先覺得自己開始有女人味。向來周海媚不嬲都俾人話係牛王妹，但原來我都可以扮到咁女人，於是我自己嘗試衣着上、化妝上朝住呢個方向走囉。」
當海味得悉早前於《翡翠音樂幹線》內，重播她的舊作〈日出愛情〉MTV時，亦忍不住戲謔，「吓？！咁耐以前嘅嘢都播番出嚟，嗰時個打扮好刻意扮玉女喎！」站在觀眾立場，相信支持現時性感形象的fans會以壓倒性姿態勝出啫。」

1998年4月2日《壹本便利》322期 雜誌掃圖

無綫又一次成功挽留藝員續約，繼汪明荃、廖啓智、陳敏兒後、周海媚亦簽下部頭約。
近年藝員們紛紛要求向外闖，電影圈吸引是較電視圈爲大，無他的，除了金錢引誘，工作態度是許多電視藝員所欣賞的。
「拍電影較爲舒服是事實，製作時間，是早已預算到，兩個月拍完，就可以收工，因此時間方面，自己可控制，拍電視又不同，開工時通告密一密，有時幾組戲一齊開拍眞係無時間休息，莫講做其他！」周海媚以她一貫的斯文語調說道。
只要將電影圈女星與電視藝員作比較，便可以証明電視台是吸青春精華，而電影圈則是發放靑春的地方。影圈女星出現時，都常保持十足狀態，因拍電影通告首先遷就藝員休息時間，而且幕後工作人員只有一個人，這就跟拍電視不同，電視劇有不同組別的編導、助導負責，但演員只得一個應付不同組，神仙也分身乏術，海味表示越爲了健康着想，越是想轉向影圈發展。
「那可以作全身投入影圈，當作新開始？」
「重新開始，又未必有此需要，况且公司開的條件又不錯，部頭約辛苦有限，可避免同時拍兩組劇嘅痛苦。不過自己是無綫捧出來的，飲水思源重感情是原因之一。」
海味自覺加入無線四年，獲益不少，得的比失的多，失去的是健康，得的是做人處世經驗、演技，而最大收穫還是身邊的他——呂良偉。
今次續約無線，海味亦有詢問男友意見，男友較自己經驗多，自然是私人老師，這段「師生戀」，海味坦言是互相欣賞嘅結果。
「我地兩個各有優點，不過，兩人相處，不免會有『拗撬』，但多數是爲少事，唔睬幾日，冷靜諗吓又會無事。」
這對情侶眞是因「了解」而結合。
海味與呂良偉近年雙雙對對出現，給人感覺已是肯定的一對，觀衆與朋友也等着喝他們的喜酒。
「無咁快，過多一、兩年先啦，我只是剛剛向影圈進軍，還未有成績，怎可以咁快嫁人。」
若要海味點頭，呂良偉便要祈禱海味事業快點有成績了。

1989年9月5日-9月11日《新電視》815期 雜誌掃圖

向來穿着比較保守的周海媚，近日也禁不住來個天生麗質難自棄，偶然會穿個玲瓏浮凸，不讓別的女藝員專美。
打她︰「向阿呂取得准許證未㗎？」
「他？」海味裝出一臉的目中無他，「我愛着什麼，他哪裏管得着。」
男朋友沒權批評女友的衣着或對某類衣飾表示不滿？
海味倒還不算太專橫︰「有權批評，但沒權管。其實我有甚麼動靜你們就搬阿呂出來，慘過他是我老公，咁樣公平咩？」
理由很簡單︰「因為阿呂曾以你的監護人自居，又說過你一切都會聽從他的……」
「佢講你又信！」話未說完已被她打斷。
早陣有人開玩笑叫她「呂師奶」，海味反面咁滯；如今又叫人別老將他倆相提並論，加上近日兩人絕少出雙入對，莫非情人倆別出事端？
她兩眼翻向天，一派沒好氣︰「估吧，猜吧，創作吧。」虧她想出「創作」二字。「我們也早已熟習圈中的空穴來風，很多言謠傳皆可處之泰然。」她說聽阿呂勸解得多，慢慢已學得刀槍難入之軀。
其實落在她身上的謠言絕不多，阿呂也不見得易招是非，兩人向來是沒有新聞的一對，皆因大家都錫住二人。就連海味狠抽烟的事，也是在她不反對下才寫出來。
說起抽烟，她嚷戒烟嚷了多時，始終未能付諸行動，原因是欠缺決心。她找藉口︰「身邊的人都在吸烟，令我很難堅定信念。」
「想到影響健康，人快殘快老也不怕？」
「就是怕這些才想戒，問題是工作環境誘惑太大。」
「阿呂怎樣看？」
「又扯到他身上了！」海味皺一皺眉责怪。「其實他也很寵我，我的一切習慣喜好之類他都不干涉，夠哂民主自由……倒有只一樣是他聲明嚴禁的︰揸快車。」
早前吃鮑魚吃到擴胸收腰妙不可言，海味如今仍是鮑魚擁躉吧？
「當然，」她神氣地雙手叉着廿三吋纖腰︰「有益養顏兼好身材，貴貴都要食。」

1990年4月17日-4月23日《金電視》766期 雜誌掃圖