Interview: 陶大宇周海媚 聯手反擊無線

海味︰我享受拍散拖

《影城大亨》擺明係講緊邵逸夫嘅故仔，所以大宇身邊嘅女人，大家都好自然咁幫佢哋代入現實嘅人物度。好似海味飾演五、六十年代嘅大明星，大家都以為佢扮緊林黛，點知海味連聲否認︰「我從來冇話過要扮邊個，只不過我個角色係五、六十年代嘅紅星，喺髮型、化妝同衫方面，梗係要跟番當時啲人，但實際上我唔需要任何人嘅神韻，做自己就得！」

反對「女追男」

所以其他演員所謂嘅壓力，話驚扮唔到真人嘅神韻，完全唔會發生喺海味身上。不過單係要模仿當時啲人嘅外表，已經一啲都唔簡單，每日淨係化妝梳頭都要搞兩粒鐘！
「我一向鍾意自己化妝，但嗰個年代啲人化妝好細緻，我咁熟手都要化成粒鐘，加埋個真假相接嘅髮型，冇兩個鐘頭我真係唔使旨意入到廠！」
今次海味同大宇一樣有感情線，但竟然係女追男，仲係追唔到悲劇收場嗰隻。海味話︰「都唔知邊個話『女追男，隔重紗』，我就追唔到佢，仲自殺死鬼埋添呀！」佢咁憤憤不平，原來因為佢好反對女追男。
一直係單身貴族嘅海味，堅持唔會放低女性嘅矜持主動追男仔︰「有Feel係一回事，放低尊嚴去追佢又係另一回事，我最多係暗示吓，點都要對方行第一步先！而且我份人幾慢熱，我可以接受一見鍾情，但擦出火花之後，我唔可能即刻同人哋行埋，一定要觀察吓先；況且大家啱啱開始，你估吓我，我又估吓你，係最正嘅階段，絕對唔少得！」

拍長拖嫌困身

海味同其他女人一樣，都希望身邊有個男人好疼錫自己，但他堅持寧缺毋濫。「我話唔鍾意有人錫就呃你嘅，不過總唔可以求其搵件就算，遇唔啱都冇計！不過我以前試過拍長拖，原來都幾困身，我好怕俾人管住管住，連著件衫低胸少少都話唔得，好鬼難頂！起碼依家冇人理我，做乜都Free啲啦！」
海味仲話自己愈來愈獨立，加上身邊好多朋友，令佢不愁寂寞，大時大節都唔怕冇人陪喎！「獨身女仔點都着數，我同男仔出街，對方一定會照顧我，冇男友咪一樣掂！」既然身邊追求者眾，海味有冇考慮過拍散拖呢？「同追我嘅人去吓街、食吓飯，又點算係拍拖呢？所以我一向視所謂嘅拍散拖為正常嘅社交活動，唔好再成日傳我同邊個邊個拍拖嘞，嗰啲唔算㗎！」

大宇海味「互冧」實錄

識於未紅時

大家可能會以為大宇同海味喺《縱橫四海》度係初結片緣，但原來早在大宇未紅時，兩人已經合作過無數次。不過據大宇話︰「當時海味已經係大明星，點會識我呢個二打六！哈哈！」

大宇︰話說當年我喺訓練班出身之後，一直做啲行行企企嘅角色，而海味已經係一線花旦，所以就算一齊拍劇，海味都未必知道我係邊個。合作過幾多次？邊度仲記得！
海味︰邊有咁嚴重呀，我記得有同你合作過，不過冇對手戲之嘛，而且你都唔係咖喱啡，已經有角色有對白啦！
大宇︰嗰啲已經係好後期嘅事，不過講到底，我哋都算識咗好耐。
海味︰梗係啦，唔係拍《縱橫四海》時邊得咁合拍！

最佳另一半

兩人合作朝夕共對咗成年，對方有乜優劣自然心知肚明，但佢哋都異口同聲表示，對方係最佳嘅終身伴侶，仲話如果有個咁嘅老公老婆就真係冇得頂！

大宇︰海味份人最唔好嘅地方就係太情緒化，最慘仲係見佢唔開心多過開心，成日開工都見到佢乸埋塊面，可能女仔貪靚啲啦，碰啱嗰日狀態唔好，或者化妝髮型唔啱心水，容易𤷪𤺧咯！
海味︰好多朋友都話我好情緒化，我得個樣㗎咋，咪睇我成日鬼咁Cool，其實係因為我唔多識笑，個樣好似好寸咁，識落個個都知我傻㗎，「鱷魚頭老襯底」係我咯！
大宇︰好彩我最拿手就係氹人講嘢，多啲搞吓氣氛佢就會開心番。而且海味好健談，基本上你問一句佢會答十句，開工對足半年都唔慌冇嘢講。
海味︰大宇份人好穩陣，同佢傾偈我唔使驚佢會周圍講，我信得過佢㗎！呢啲人做老公就最好！因為感覺上佢唔會係一個浪漫嘅男人，但就夠晒細心，又識得照顧人，就算佢唔喺身邊，都唔使擔心佢會去滾，咁嘅男人唔做老公真係嘥咗！
大宇︰我唔敢講自己係好老公，但正如海味所講，我真係幾鬼悶嘅人，如果啲好活躍嘅女仔對住我，真係驚悶親佢。
其實我都覺得海味會係一個唔錯嘅太太，起碼佢個人夠實際，做嘢好有條理，唔會亂晒大籠。姑勿論佢幾咁情緒化，但有心做一件事，就會好認真。所以佢第時個老公仔唔使擔心娶咗個包袱返屋企，因為海味會好識照顧自己。

聽完佢哋咁講，差啲以為佢哋一個唔覺意戲假情真，好彩大宇即時強調自己已經搵啱咗一個，而海味亦都話咁「理想」嘅男人，未必啱佢，佢仲要繼續搵吓先喎！

2000年4月27日 《東周刊》392期 (陶大宇的單獨訪問沒發布) 雜誌掃圖