Interview: 周海媚新歡蒲頭 愛在黎明之後

蛛絲馬跡

周海媚在情路上，近年屢與黎明的名字聯在一起，兩人好了又分，分了又好，唯一相同是永恆否認拍拖。
傳聞黎明與周海媚年初舊情復熾，可惜中間又多了個李嘉欣，黎明與李嘉欣日久生情，打得火熱。
海味對黎明又與李嘉欣關係「密切」，顯得十分心淡，故促使她發展新戀情，竟與主持「最緊要健康」的吳家樂拍起拖來，兩人的戀情始於上月，一同到印度拍旅遊特輯。
據消息透露當中有不少蛛絲馬跡，證實兩人不是朋友咁簡單。
蛛絲（一）︰在印度拍旅遊特輯時，因周海媚有陰陽眼，很早已感受到「唔乾淨嘢」，而同行嘅張沅薇又好細膽，所以大夥兒每夜都會聚在一起玩啤牌、玩遊戲打發時間。身為男士嘅吳家樂自告奮勇，陪女士度過漫漫長夜。雖然還有馬浚偉及其他工作人員，但家樂與海味愈傾愈投契，家樂又好抵得諗，成日唔瞓陪海味。到後期海味甚至很公開地對CREW（工作人員）講，吳家樂追緊佢添。
蛛絲（二）︰在印度之旅後，海味在上「翡翠音樂幹線」，接受劉倩怡訪問時，談及一些戀情，爆響口説曾經與比自己細嘅男仔拍拖。
吳家樂現年二十三歲，海味大約二十八、九歲，所講嘅頗脗合。
馬跡（三）︰某日晚上七時許，記者於沙田區目睹吳家樂與海味同車，家樂仔做柴可夫司機，開車期間，家樂仔常常望着海味，海味與他對望，表情十分之「冧」，儼如一對熱戀中的男女。
馬跡（四）︰據消息話自吳家樂與海味打得火熱後，有人目睹吳家樂常常造訪海味香閨，出雙入對，吳家樂甚至做司機，管接管送。

當聽到自己與吳家樂的緋聞時，周海媚的反應是哈哈大笑。
「怎麼只會傳他？其實，在印度的整個旅程，所有台前幕後的工作人員，都對我很好，對我殷勤的人多的是。」
周海媚是個好保護自己的人，一直都對人保持距離，但今次印度之旅，因為途中遇到「唔乾淨嘢」，令海味處處提心吊膽。
「我一向都比較容易睇到啲唔想睇嘅嘢，如果喺香港，知道自己無做虧心事，自然乜都唔驚，不過去到陌生地方，人生路不熟，就會分外惶恐。」
她因太驚，夜晚唔敢瞓，而其他工作人員對她好體貼，晚晚陪她玩啤牌，又一齊傾偈，圍牆的海味都溶化了。
「今次行程，台前幕後都係後生仔女，自然會較易玩得埋，同全組人都玩得好開心。」
吳家樂可會對她特別殷勤？
「他確是對我很好，因為知我驚，自然會自告奮勇護花，但我不認為有追求之意，只係男仔保護女仔，是最自然的事，係本能吧，我想今次只是外間太敏感，才會有緋聞傳出。」
她可會介意男朋友年紀比她輕？
「我覺得二人相處，唔係用年紀來衡量，我有一個朋友，她的男朋友比她年輕五年，不過卻沒影響二人發展，因為男的思想成熟，有時人是否成熟，唔係因他年齡，而是他的學歷和内涵，所以，如果我真的遇到一個適合自己，但年紀比自己小的人，我不敢斷言拒絕，因為世事無絕對，但現階段，我還是覺得年紀比我大、閱歷比我深的男士，才會給予我安全感。」
那她對家樂的印象如何？
「好，基本上全組工作人員都好好，但一回港，大家又各有各忙，根本都無聯絡，能夠傳緋聞，真令我百思不得其解。」
二人私底下，可有約會過？
「回港之後，大班人員約過食飯一次咁多，跟住就喺招待會見過，正如之前講各有各忙，所以無約會，而且佢都無約我，我又唔係主動的人，唔會約人。」
窈窕淑女，君子好逑，海味可感受到身邊有人向她展開追求？
「我唔知道，目前我都是以事業為重，而且工作實太多，又唔定時，亦要飛來飛去，根本好難有時間跟人培養感情，所以即使有人有心追求，我都會立即避開，免累己累人。」
記者曾見過她與一男士同乘保時捷跑車，這位男士可是追求者之一。
「他對我很好，不過都識咗兩年，如果要追都追到喇，我覺得男同女，是有點友誼存在的，我又唔會因別人講而唔同佢見面，不過我哋唔係拍拖。」
海味承認自己是無膽入情關，所以人哋追求係一件事，自己會堅持不墮情網。
「愛情對我嚟講，真係件頭痛的事，所以免得過，都唔想煩。」
她與吳家樂的戀情還有沒有下文，真要等着瞧了。

1995年11月12日《東方新地》236期 雜誌掃圖